தொடர் எண் 5.
தலைப்பு : நட்பு.
கொள்வாயே நண்பர்கள் குன்றாத பண்புடனே
உள்ளங்கள் ஒன்றாக ஊர்போற்றும் நட்பினையே
பள்ளங்கள் மேட்டினிலும் பற்றுடனே எந்நாளும்
தள்ளாத மூப்பினிலும் தாங்குகின்ற ஊன்றுகோலாய்.
ஊன்றுகோலாய் வாழ்க்கையினில் ஒன்றுபட்டு நிற்பீரே
சான்றோராய் நின்றொளிர்க சாதனைகள் செய்திடவே
தோன்றுகின்ற துன்பங்கள் தோல்விகளைத் தந்திடினும்
தேன்போன்றத் தன்மையுடன் தென்றலாக மென்மைபெற்றே.
மென்மையுடன் பேசிட்டால் மேன்மைகளும் பெற்றிடலாம்
நன்மைகளும் கிட்டிடவே நட்பினிலே மேம்படுவாய்
பொன்னாக எண்ணிடுவாய் போற்றுகின்ற பெரியோர்சொல்
ஒன்றுபடு சாதிப்பாய் உற்றதோழன் கரம்கோர்த்தே.
தேனாகப் பேசிடுவார் தீப்பிழம்பாய் நெஞ்சினிலே
வானாகப் போற்றிடுவார் வஞ்சகத்தில் விஞ்சிடுவார்
கோனாக நீயென்பார் குற்றங்கள் நோக்கிடுவார்
தானாக வந்ததையும் தன்னால்தான் வெற்றியென்பார்.
வெற்றியுண்டு நண்பனாலே வேராகத் தாங்குதலால்
பெற்றிடுவாய் ஓங்குபுகழ் பெற்றவர்கள் ஆசியுடன்
சுற்றம்போல் நண்பர்கள் சோர்வினையும் நீக்கிடவே
நற்புகழும் பெற்றிடலாம் நாமணக்க வாழ்த்திடவே.
முன்னே செல்ல
