எழுதா விதிகளைத் தகர்ப்போம், எழுந்துவா பெண்ணே

நடுவராக முகநூலிலும் வடமாகாணத்திலும் வலம் வருகிறீர்கள்.இந்த நடுவர் பணியில் இருந்து உங்களுக்குத் தாக்கத்தை ஏற்படுத்திய விடயங்கள் எவை?

முகநூலில் வளர்ந்தவர்களின் பயணம். இங்கு வேறு நடுவர்கள் தமக்குத் தெரிந்ததை எல்லாக் கவிஞர்களும் ஏற்க வேண்டும் என்பதும், பயிற்சித் தளம் என்பதை மறந்து முரணானவற்றை திணிக்க முயல்வதும் அதற்கு நானும் ஒப்புதல் கொள்ள வேண்டும் என நினைப்பதும் எனக்கு வேடிக்கையாக இருக்கும். அத்தோடு, நான் நானாக இருப்பதையும் எனக்கான ஒரு தனித்துவத்தைப் பேணுவத்திலும் அதிக கவனம் கொள்கிறேன். அடுத்து, யாழில் நடுவர் பணியில் என்னைப் பற்றிக் கொள்ளும் கவலை அழகான பிள்ளைகளுக்கு வேற்றுமொழியில் பெயர் சூட்டி இருக்கும். அத்தோடு, சிலர் வாசிப்பின் முக்கியத்துவத்தைப் பிள்ளைகளுக்கு உணரச் செய்வதில்லை. இதன் விளைவைப் போட்டிகளில் கண்டு மனம் வலிக்கும்.

“வாசிப்பு அருகி விட்டது”இக்குற்றச் சாட்டை ஏற்றுக் கொள்கிறீர்களா?

இல்லை. ஒருபோதும் வாசிப்பு அருகி விடவில்லை. பெற்றோர் தான் பிள்ளைகளில் வழிகாட்டிகள். அவர்கள் வாசிக்கிறார்களா? ஆசிரியர்கள் வாசிக்கிறார்களா? எல்லோருமே கைப்பேசியில் மூழ்கியுள்ளார்கள். அப்படியிருக்க எப்படி பிள்ளைகள் வாசிக்க முடியும்?

விருப்பத்தோடு புத்தகத்தைத் திறந்து வாசிக்க வேண்டும். பெற்றோர் ஆசிரியர்கள் விரும்பிப் பயன்படுத்துவது கைப்பேசி தானே. எந்த அளவுக்கு அறிவியல் வளர்ந்ததோ அந்தளவுக்குப் பிள்ளைகளின் பலவித வளர்ச்சிகளும் பாதிப்படைகின்றன பெற்றோரால்.

பெண்ணியவாதியாகப்பெண்களுக்கும், இலக்கியவாதியாக இளையோருக்கும் கூறவிரும்புபவை எவை?

பெண்களுக்கு…

பெண்கள் தங்கள் சுயத்தோடு வாழ வேண்டும். யாரும் யாருக்கும் அடிமை இல்லை என்கிற மனநிலையோடு மற்றப் பெண்களையும் தட்டிக் கொடுக்க வேண்டும்.

திருமணமாகிக் குடும்பத்தில் பிரச்சனை வந்தால் பெற்றோர், சமூகம் என்று பயந்து தற்கொலையில் மாளாது,  படுகொலைக்கு தலையை நீட்டாது எச்சரிக்கையாக வாழவேண்டும். பிடிக்கா விட்டால் உடனே விலகி விடவேண்டும்.

வாழ்க்கைத் துணையாகவே வந்தோம் உயிரைக் கொடுக்க வரவில்லை என்ற உயர் சிந்தனையோடு பாது காப்பை உறுதி செய்ய வேண்டும்.

நான் அழகானவள், மேன்மையானவள், தனித்து வாழ முடியும் என்ற தன்னம்பிக்கையோடு வாழ்ந்து காட்ட வேண்டும். திருமணம் வாழ்வின் முழுமையல்ல, ஒரு சிறு பகுதியே. திருமணம் செய்யாமலும் நிறைவாக வாழ முடியும் என்கிற மனப்பக்குவம் ஒவ்வொரு பெண்ணுக்கும் வேண்டும்.

  இளம் சந்ததியினருக்கு… வாசியுங்கள். இலக்கியங்களை வாசியுங்கள். எங்களின் அடையாளமான இலக்கணத்தை தெளிவாகப் படியுங்கள். இலக்கணத்தைப் படித்தால் மரபுக் கவிதை மட்டுமல்ல, எல்லாக் கவிதைகளும் எழுத முடியும். மரபிலக்கணம் தெரிந்த ஒருவரே மொழியில் முழுமைத்துவம் கொள்ள முடியும் என்பது எனது கருத்து. ஆக, மொழியறிவை இளையோர் நிறைவாகக் கற்றுக் கொள்ள இன்றே முயலுங்கள் என்பது எனது தாழ்மையான வேண்டுகோள்.

உங்கள் பார்வையில் தமிழ்நெஞ்சம் குறித்து கருத்தைச் சொல்லவும்...

தமிழ்நெஞ்சம் தமிழர் நெஞ்சங்களில் என்றும் நிறைந்திருக்கும்.  நிலைத்திருக்கும். 53 வருடங்கள் தன்னுடைய தொடர்பணியைப் பல இன்னல்களை எதிர்கொண்டும் தமிழினத்திற்காக மாதந்தோறும் அறிவார்ந்த பலவற்றைச் சுமந்து பல பன்முகப் ஆளுமைகளை உலகுக்கு அறிமுகம் செய்து இலக்கிய வரலாற்றிலும், ஊடக வரலாற்றிலும் தனித்துவத்தோடு மிளிர்கிறது.