திரிகடுகம் – மூலமும் விருத்தியுரையும் – 52

பாடல் – 52

கண்ணுக் கணிகலம் கண்ணோட்டம் காமுற்ற
பெண்ணுக் கணிகலம் நாணுடைமை – நண்ணும்
மறுமைக் கணிகலம் கல்வியிம் மூன்றும்
குறியுடையோர் கண்ணே யுள.

(இ-ள்.) கண்ணுக்கு – கண்களுக்கு, அணிகலம் – அணியத் தக்க பூணாவது, கண்ணோட்டம் – கண்ணோடுதல்; காமுற்ற – (கணவனால்) விரும்பப்பட்ட, பெண்ணுக்கு – குலமகளுக்கு, அணிகலம் – அணிகலனாவது, நாண் உடைமை – நாணம் உடையவளாயிருத்தல்; நண்ணும் – பொருந்துகின்ற, மறுமைக்கு – மறுப்பிறப்புக்கு, அணிகலம் – அணிகலனாவது, கல்வி – கல்வி அறிவு; இ மூன்றும் – ஆகிய இம் மூன்றும், குறி உடையார் கண்ணே – ஆராயும் இயல்புடையாரிடத்தே உள – உண்டு; (எ-று.)

(க-ரை.) கண்ணோட்டத்தாற் கண்ணும், நாணத்தாற் பெண்ணும், கல்வியால் மறுமையும் அழகு பெறும் என்பது.

அணிகலம் : வினைத்தொகை. கண்ணோட்டமாவது தன்னோடு பழகினவர் சொன்னவற்றை மறுக்க மாட்டாமை; அஃது அவர்மேல் கண் சென்ற பின்பே உண்டாவது பற்றி. கண்ணோட்டம் காரண ஆகுபெயர். நாணம் – பெண்கட்குரிய நாற்குணங்களில் முதன்மையானது. மற்றவை மடம் அச்சம் பயிர்ப்பு என்பன. ஓட்டம் – அம் : கருவிப் பொருளணர்த்தும். உடைமை : இடைநிலைத் தீவகவணி. சிற்றுயிர்க்கு உற்ற துணையாகிய கல்வி ஒருவனுக்கு இம்மையில் நன்மையைச் செய்து மறுமையிலும் இன்பம் தருதலால் மறுமைக்கு அணிகலம் என்றார். உள : உண்மை என்னும் பண்படியாகப் பிறந்த பலவின்பால் வினைமுற்று.

முன் பக்கம் செல்ல…    தொடரும்