சாதிக்கப் பிறந்தவர் – லிடியன் நாதஸ்வரம்

சிறு வயதிலேயே எப்படி இசை ஆர்வம் ஏற்பட்டது?

என் தந்தை,  திரு. வர்ஷன் ஒரு இசைக் கலைஞர். சகோதரி அமிர்தவர்ஷிணி பாடகி, புல்லாங்குழல் மற்றும் சாக்ஸபோன் கலைஞர். இருவருமே  பாடிக்கொண்டும்,,  அல்லது இசை கருவிகளை மீட்டிக் கொண்டும் இருப்பதால், எங்கள் வீட்டில் எப்பொழுதும் இசை ஒலித்துக் கொண்டே இருக்கும். எனக்கும்,  என் அக்கா அமிர்தவர்ஷிணிக்கும் நல்ல இசையை அடையாளம் காட்டியும்,  ஊட்டியும் எங்கள் தந்தை வளர்த்திருக்கிறார். தென் இந்திய இசை  வட இந்திய இசை  மேற்கத்திய இசை,  சினிமா பாடல்கள்  கர்நாடக சங்கீதம், வாத்தியக் கருவிகளின் இசை என்று பல விஷயங்களையும்  அறியப்படுத்தியதால், அவைகளைக் கேட்டுக் கேட்டு பழகிய எனக்கு இசையின் மேல் மிகுந்த ஆர்வம் ஏற்பட்டது.

‘சி.பி.எஸ்.’ (Columbia Broadcasting System) அமைப்பின்  சார்பில் நீங்கள் பங்கு கொண்டு உலகையே திரும்பிப் பார்க்க வைக்கும் அளவிற்கு சாதித்ததும்   அதற்கு உங்களுக்கு கிடைத்த சன்மானமும் பற்றி சில வரிகள் கூறுங்களேன்?

சிறுவயதிலிருந்தே எங்கள் தந்தை,  திரு. வர்ஷன்,  எங்கள் இருவரிடமும்,  நீங்கள் சிறப்பாக வாசித்தால்,  நீங்க தான் வேர்ல்ட் பெஸ்ட் ஆக இருப்பீர்கள் என்று கூறிக் கொண்டே இருப்பார். இந்த வாக்கியம் எனக்கு  ஒரு தாரக மந்திரம் போலவே ஆகிவிட்டது.

எனக்கு சுமார் பதிமூன்று வயது இருக்கும் பொழுது,   ஒரு சிறப்பான மேடை அமைந்தது. என் தந்தை,  பொதுவாக எங்களை எந்த தொலைக்காட்சிக்கும் அல்லது மேடைக்கும் போட்டிக்கு என்று அனுப்பியது இல்லை. ஆனால் எங்கள் வாசிப்பை  பல இடங்களுக்கு  வீடியோவாக அனுப்பி இருக்கிறார். அப்படி அனுப்பியதில் அமெரிக்காவின் ஒரு டிவி சேனலில் இருந்து என் தந்தைக்கு அழைப்பு வந்தது.  ‘ உங்கள் மகனின் வாசிப்பை நாங்கள் கேட்டோம்.  மிகவும் நன்றாக உள்ளது. இங்கு மிகப் பெரிய அளவில் ஒரு போட்டி  நடக்கப் போகிறது. அந்தப் போட்டியில்   195 நாடுகள் கலந்து கொள்ளப் போகின்றன. அதில் தேர்வான 65  நாடுகளைச் சேர்ந்த கலைஞர்கள்,  இங்கு சேனலில் நேரில் வந்து வாசிக்கப் போகிறார்கள் .மற்றவர்கள் வீடியோவிலேயே எலிமினேட் ஆகி விடுவார்கள். நாங்கள் இந்தியாவிலிருந்து உங்கள் மகன் ஒருவரை தான் தேர்வு செய்திருக்கிறோம் .இதில் வெற்றி பெறும் கலைஞருக்கு “The World’s Best” என்கிற பட்டம் கிடைக்கும்’ என்று கூறினார்கள். அந்தப் போட்டிக்கு அனுப்ப என் தந்தை எண்ணம் கொண்டார். என்னுடைய வீடியோக்களை அவர்களுக்கு அனுப்பிய பொழுது,  65 நாடுகளில் கலந்து கொண்ட கலைஞர்களில், இந்தியாவிலிருந்து ஒரு கலைஞனாக என்னை மட்டுமே  தேர்வு செய்தார்கள் என்பது எவ்வளவு பெரிய விஷயம்.

அமெரிக்காவில் லாஸ் ஏஞ்சல்ஸ் நகரில் நடந்த இந்த போட்டியில்  செமி பைனல்ஸ்,  பைனல்ஸ் என்று தேர்வு  செய்யப்பட்ட  ஒரு மாதம் காலம் வரை அங்கேயே தங்கியிருந்தோம். செமி பைனல்ஸ் நடந்த பொழுதுதான், ‘இந்தப் பட்டத்தை வென்றவருக்கு,   ஒரு மில்லியன் அமெரிக்க டாலர்கள் பரிசுத்தொகையாக கிடைக்கும்’ என்று கூறினார்கள்.  பைனலில் தேர்வு பெற்று ‘வேர்ல்ட்ஸ் பெஸ்ட்’ என்கிற டைட்டிலை  வென்ற பொழுது  எல்லோரும் அவ்வளவு சந்தோஷப்பட்டார்கள். இது ஒரு மில்லியன் டாலருக்காக ஏற்பட்ட சந்தோஷம் அல்ல. என்னுடைய படிப்பை நிறுத்திவிட்டு முழுவதுமாக இசைப்பக்கம் என்னைத் திருப்பியதில்,  பலருக்கு என் வாழ்க்கையை தந்தை கெடுத்து விட்டார் என்கிற எண்ணமே வந்தது. இதனால் நான் யாரையும் குறை சொல்கிறேன் என்கிற அர்த்தமில்லை. நான் இந்தியாவிற்கே பெருமை சேர்த்திருக்கிறேன் என்கிற பெரிய விஷயம்,  எல்லாவற்றையும் கடந்து வரும்படி செய்து விட்டது. இந்த போட்டி,   சீசன் 1 ,சீசன் 2 , என்பது போன்று நடத்தும் போட்டி அல்ல. கூகுளில், வேர்ல்ட்ஸ் பெஸ்ட் என்று தேடிப்பார்த்தால்  லிடியன் நாதஸ்வரம் என்கிற  பெயர் ஒன்று மட்டும்தான் இருக்கும். அதற்கு முன்போ இல்லை அதற்குப் பின்போ அந்த மாதிரி போட்டிகள் நடத்தப் படவில்லை என்பது புரியும். பிறந்த நான்கு மாதங்களில் இருந்தே இசையை நான் ரசித்ததாக பெற்றோர் சொல்லி கேட்டிருக்கிறேன். மியூசிக் மியூசிக் என்று இசையை விரும்பி ஏற்று ஒரு நாளைக்கு பதினாறு மணி நேரம் பிராக்டிஸ் எடுத்து நான் உழைத்ததற்கு  எனக்குக் கிடைத்த டைட்டில், ஆண்டவன் கொடுத்த மிகப் பெரிய வரப்பிரசாதம் என்றுதான் சொல்ல முடியும்.