கொளுத்திப் போட்ட பட்டாசுகளில்
மருந்துகளைத் திரட்டிக் கொண்டிருந்தான்.
இதை வைத்தே வெடிகளைத் தயாரித்து விடுவான்.
ஒவ்வொன்று வெடிக்கும்,
ஒவ்வொன்று புஸ்ஸ்ஸ் விடும்.
அடுத்த வீட்டு அண்ணன் கொடுத்த
பழைய உடைதான், இவனுக்குப் புதிய உடை!
ஆண்டை வீட்டிலிருந்து, எப்படியும்
அம்மா, பாயசமும், வடையும் கொண்டு வந்துவிடும்.
தங்கச்சி பாப்பாவுக்கு மட்டும்
ஆண்டை வீட்டிலேயே புதுத்துணி எடுத்திட்டாங்க,
அவளுக்காக, சேர்த்துவைத்த பணத்தில் இவன்
வளையலும், பொட்டும் வாங்கி வைத்திருக்கிறான்.
தலைக்குக் குளித்தாலே போதும்,
தீபாவளி சூப்பராகத் தொடங்கிவிடும்.
ஆனாலும்,
அவனுக்கு ஒரு வேண்டுதல் உண்டு!
மட்டும் எப்போதும் போல் அப்பா
எங்கேயாவது விழுந்து கிடந்தால் போதும்,
இல்லையென்றால், வந்து குடித்துவிட்டு
இந்தத் தீபாவளியும் புஸ்ஸ்ஸ் விட்டுக்கும்!
