சங்கே முழங்கு

தேனாய்  சுவையாய் திகட்டாத
— கனியாய் கண்ணாய்  கனியமுதாய்
மானாய்  மயிலாய் மரகதமாய்
— மலராய் மணியாய் மாம்பூவாய்.
வானாய்  வளியாய் வயல்வெளியாய்.
— வழியாய் ஒளியாய் ஒலியினிலே.

எங்கும் என்றும் எத்திக்கும்
— எல்லாம் தமிழின்  உயர்வாகும்.
ஓங்கும்  தாங்கும்  மனதினிலே
— உருவாய் கருவாய்  கவியினிலே.
பொங்கும் பொழியும் புவிதனிலே
— சங்கே  முழங்கு  சபைதனிலே.

சொல்லும்  சுவையும் இனித்திடவே
— சுடராய் இருளை நீக்கிடவே
கல்லும் மண்ணும் தோன்றிடுமுன்
— கவியில்  தந்தான் இலக்கணமே.
வெல்லும்  மொழிதான் எம்மொழியே
— சங்கே முழங்கு  கவியினிலே.

அறுசீர்  விருத்தம். மா – மா – காய்.