ஆவி யுடற் கரண மனைத்து மொன்றாகித்
தாவித் தமிழோடுத் தவிழ்ந்திருப்பேன் – பூவுலகில்
மாற்றக் காட்டாறு மையற்றாங் கொண்டாலுஞ்
சாற்றும் மரபுக்குண்டோ சா?

வாழையடி வாழை நின்று
வண்ணத் தமிழாடை கொண்டு
வையமுள்ள வரைக்கும் வரும் மரபு – சட்ட
வரம்புகளை மீறிவிட்டா லிழிவு.
பாளைமடித் தேனை வென்று
பல்சுவையிஞ் சாரமுண்டு
பைந்தமிழிற் புதுமை ஒன்று வரவு – திட்டப்
பாதையிலே மாற்றங் கொண்ட துறவு!

மாற்ற மென்றாற் புது வளர்ச்சி
மரபுக்கு ளது மலர்ச்சி
மானிலத்தி னொப்புரவுத் தன்மை – கெட்ட
மாற்றங்களால் மாளுந் தமிழ் உண்மை
தோற்றங் கொண்ட தொற் றமிழிந்
தொல்காப்பியம் முதற் கொண்டு
தோகை விரித்தாடுகின்ற மொழியில் – ஏதும்
துன்பம் வரின் பெருகும் நீர் விழியில்

நன்னூலிற் பவணந்தி
நயந்துரைத்த இலக்கணத்தை
நல்லபடி நோக்கி விடின் புதுமை – மனம்
நாடும் வழி நாடிடுவோர் பதுமை
முன்னோர்கள் அமைத்த விதி
முறைமையிலே படைத்த மதி
முன்னேறிப் போகு மென்ப துறுதி – செம்
மொழிக்கென்றும் காலமில்லை இறுதி!

மாற்றம் என்ற போர்வையிலே
மரபழியும் நிலை வந்தால்
மாய்த்துயிரைப் போக்குவதே மானம் – சில
மாற்றங்கள் நமக்கு அவமானம்
காற்று மின்னல் வேகத்திற்
கணிப் பொறிகள் தேகத்தில்
காலமெல்லாஞ் செம்மொழியைச் சேர்ப்போம் – இந்தக்
காசினியைத் தமிழ்ப்பூவாற் கோர்ப்போம்!

பயனுள்ள மாற்றங்கள்
பாருக்குள் நடக்கிறது
பல்வகைமைப் பனுவ லிங்கே வேண்டும் – அதற்கு
பகலிரவாய் உழைப்போமே யாண்டும்
சயனத்தில் மூழ்கி விடும்
சண்டாளர்ப் பெருக்கெடுத்தாற்
சாரமுள்ள செந்தமிழே வாடும் – இந்தச்
சங்கதிக்கு யென்று வருங் கேடும்!

வள்ளுவனிஞ் சொல்லனைய
வையகத்தோ டொட்டொழுகி
வாழ்வதிலே யென்று முண்டு ஏற்றம் – இணை
வலைத்தளத்தில் வீசும் தமிழ்க் காற்றும்
தெள்ள முதச் சாகரத்தின்
தெளிவான பொக்கிஷத்தைத்
தேசம் பலத் தாண்டச் செய்வோம் வாரீர் – சுனைத்
தேனருவி பொங்குவதைப் பாரீர்!

அறிவியலின் பெரு வளர்ச்சி
அகிலத்தை நிறைக்கிறது
அதற்கேற்ற அழகாடை கொடுப்போம் – தமிழ்
அணங்கைத் தான் ஆடையென உடுப்போம்
நெறிமுறைமைப் பண்பாடு
நெக்குவிடா அன்போடு
நெருக்குற்ற செம் மொழியைக் காப்போம் – இள
நெஞ்சங்களின் இதயத்திற் சேர்ப்போம்.


மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன

Related Posts

புதுக் கவிதை

கன்னியின் கண்ணீர்

காலம் கனியுமா
கனவுகள் பலிக்குமா
கவலைகள் கலையுமா
கன்னி மனம் மகிழுமா!!

தண்ணீரில் மீன்
அழுதால் தெரியுமா
கண்ணீரில் போடும்
கோலம் நிலைக்குமா!!

 » Read more about: கன்னியின் கண்ணீர்  »

புதுக் கவிதை

கவிதை: விரதம்

தெலுங்கில் எழுதியவர்: உஷா துரகா

காருக்குக் குறுக்கே வந்தவனை
வாய் வலிக்கத் திட்டிய அரைமணிக்கு
அன்று மௌன விரதம் இருப்பது
நினைவு வந்தது

இரண்டாவது குலாப்ஜாமூன்
தொண்டைக்குள் இறங்கும்போது
அன்று உபவாச தீட்சை இருப்பது
நினைவு வந்தது

ஹாய்…குட் மார்னிங்..

 » Read more about: கவிதை: விரதம்  »

அஞ்சலி

உனக்கு ஏது உறக்கம்.?

தோன்றிய கால முதல் தூண்டாய்
மணி விளக்காய் தோன்றிய.
தமிழ்த் தாயின் தலைமகனே.
குமணன் தலை கொடுக்க முன்வந்தான்
நீயோ தன்னையே தமிழுக்கு தந்தாய்
புறநானூறு அகநானூறு ஆக
மொத்தம் எண்ணூறு என
எண்ணிக் கொண்டிருந்தவர்கள் மத்தியில்
சங்கத் தமிழின் சங்கதிகளை
சரித்திரமாய் சொன்னவன் நீயே
மனிதகுலத்தின் போக்கு வரத்திற்கு
கோடு கிழித்த வள்ளுவனுக்கு
வான் புகழ் கொண்ட சிலை அமைத்தவன் நீயே
உரை வீச்சில் உள்ளத்தை உருக வைத்தவனே
மூட நம்பிக்கையை முட்டித்தள்ள
முழு வீச்சில் முயன்றவனே
சினிமாக்கள் அறியாமையை விதைத்தபோது
வாழ்க்கையின் யதார்த்தத்தை அறிவோடு கலந்தவன் நீயே
கதா கலட்சமாக கவி அரங்குகள்
காட்சி அளித்தபோது கவி
அரங்குகளில் புரட்சி செய்த புதுமையாளனே
கழிக்க முடியாத கடன் பிறப்புகளை
பெற்ற கலைஞரே.

 » Read more about: உனக்கு ஏது உறக்கம்.?  »