தியத்தலாவ எச்.எப்.ரிஸ்னா

உங்களுக்குள் சிறுகதைகள் எவ்வாறு உருவாகின்றன? உங்களது வைகறை என்ற சிறுகதை நூலின் கருப்பொருட்கள் பற்றிக் குறிப்பிடுங்கள்?

அன்றாடம் நம்மைச் சுற்றி நிகழ்ப வற்றைக் கூர்ந்து அவதானித்தாலே எமக்குத் தேவையான கதைக் கரு கிடைத்துவிடுகிறது. அல்லது சில பொழுதுகளில் நாம் செய்திகளின் ஊடாக கேட்கின்ற, வாசிக்கின்ற, நாம் அன்றாடம் கேள்விப்படுகின்ற விடயங்களில் கூட கதைக் கரு காணப்படலாம். அவற்றில் தேவையானவற்றை மாத்திரம் தெரிவு செய்து அதை ஒரு சிறுகதையாக மாற்றுவதில் தான் எமது திறமை காணப்படுகிறது. எனது நூலில் காணப்படுகின்ற பல சிறுகதைகள் நான் கேள்வியுற்றவையும் வாசித்து அறிந்தவையும் பற்றியதான சம்பவங்களை மையமாக வைத்தே எழுதப்பட்டுள்ளன. ஓரிரு சிறுகதைகளில் மட்டுமே நேரில் கண்ட அனுபவங்கள் பதிவு செய்யப்பட்டுள்ளன. எனது வைகறை என்ற சிறுகதை நூலில் 21 சிறுகதைகள் காணப்படுகின்றன.

உதாரணமாக அழகன் என்ற சிறுகதை யானது உண்மையில் மூன்று வயது நிரம்பிய ஒரு ஆண் குழந்தையைப் பற்றியதாகும். எனினும் நான் அதனை எனது நண்பர்களிடம் சொல்லும் போது ஒரு வாலிபனைப் போல சித்தரித்துச் சொன்னேன். இறுதியில்தான் அது ஒரு மூன்று வயதுக் குழந்தை என்று சொன்னபோது அவர்கள் செல்லமாகக் கோபித்து, என்னைக் கடிந்து கொண்டார்கள். அந்த அனுபவத்தையே எனது கதையில் பதிவு செய்துள்ளேன்.

மாற்றம் என்ற சிறுகதை ஒரு ஏழை மாணவன் பற்றியதாகும். தன் வகுப்பில் கற்ற ஏழைச் சிறுவனான முரளி என்ற மாணவனை சித்ரா டீச்சர் வார்த்தைகளால் துன்புறுத்துகிறார், அவமானப்படுத்துகிறார். நன்றாகக் கற்று பல்கலைக்கழகம் வரை சென்ற போதும் ஏழை என்ற காரணத்தால் முரளி ஏனைய மாணவர்களால் அங்கும் நிராகரிக்கப்படுகின்றான். அதையெல்லாம் தாண்டி அவன் நன்கு கற்று, சிறப்பாகச் சித்தியடைந்து, இறுதியில் ஒரு வைத்தியராக மிளிர்கின்றான். ஏழை முரளிதான் தற்போது வைத்தியர் முரளி என்று அறியாத சித்ரா டீச்சர் தன் மகளுக்கு முரளியை மணமகனாக்க எண்ணுகிறார். இறுதியல் என்ன நடந்தது என்பதே கதையின் சுவாரசியமான நகர்வாகும்.

உங்களுக்குப் பிடித்த சிறுகதையாசிரி யர்கள் மற்றும் நாவலாசிரியர்கள் ஆகி யோரின் படைப்புகள் குறித்து?

சொல்ல வந்ததை பிசறின்றி சொல்லும் பாங்கும் பிரதேச வழக்கும் வட்டார மொழிகளும் சிறுகதையின் ஸ்தீரத் தன்மையைத் தீர்மானிக் கின்றன. திக்குவல்லை கமாலின் முட்டைக் கோப்பி, உ.நிசாரின் கால சர்ப்பம், பவானி சிவகுமாரனின் மரம் வைத்தவன், தேடலே வாழ்க்கையாய், நிஜங்களின் தரிசனம், மரீனா இல்யாஸ் ஷாஃபியின் குமுறுகின்ற எரிமலைகள், நீர்வை பொன்னையனின் காலவெள்ளம், நிமிர்வு, நினைவுகள் அழிவ தில்லை மற்றும் வந்தனா, திக்குவல்லை ஸப்வானின் உம்மாவுக்கு ஒரு சேலை, வாப்பாவுக்கு ஒரு சால்வை, சூசை எட்வேடின் இவன்தான் மனிதன் போன்ற சிறுகதை நூல்கள் என்னை மிகவும் கவர்ந்தவை.

அதேபோல நாவலைப் பற்றி சொல்வதானால் தொடர்ந்து வாசிக்க வேண்டும் என்ற உணர்வும் விறுவிறுப்பும் நாவலில் இருந்து மீள முடியாத தன்மையும் கொண்டனவாக அமைதல் வேண்டும். இந்தவகையில் நயீமா சித்தீக்கின் வாழ்க்கைப் பயணம், மல்லவப்பிட்டி சுமைரா அன்வரின் விடியலில் ஓர் அஸ்தமனம் மற்றும் வசந்தங்கள் வாழ்த்துச் சொல்லும், ஸனீரா காலிதீனின் அலைகள் தேடும் கரை, இரா. சடகோபனின் கசந்த கோப்பி மற்றும் உழைப்பால் உயர்ந்தவர்கள், சுலைமா சமி இக்பாலின் ஊற்றை மறந்த நதிகள், மா.பா.சி. பாலசிங்கத்தின் தழும்பு (இரு குறுநாவல்கள்), திக்குவல்லை கமாலின் பாதை தெரியாத பயணம் மற்றும் வீடு, உ. நிசாரின் கோதுமைக்கனி, மைதிலி தயாபரனின் வாழும் காலம் யாவிலும் மற்றும் சொந்தங்களை வாழ்த்தி, ஆனந்தியின் இரு குறுநாவல்கள், கெக்கிறாவ ஸஹானாவின் ஒரு கூடும் இரு முட்டைகளும் ஆகிய நாவல்களை வாசித்த சுகானுபவம் இன்னும் என் நெஞ்சைவிட்டு நீங்கவில்லை.

ஒருவர் ஏன் வாசிப்புப் பழக்கத்தை ஏற்படுத்திக்கொள்ள வேண்டும்?

வாசிப்புப் பழக்கத்தை ஏற்படுத்திக் கொள்வதனூடாகத்தான் எமது சிந்தனைத் திறனை பரந்துபட்டதாக ஆக்கிக்கொள்ள முடியும். அன்றாட நிகழ்வுகள், உலகில் காணப்படும் சமகாலப் பிரச்சினைகள் அதே போன்று மனித அவலங்கள் போன்றவற்றை அறிந்து கொள்ள முடியும். தற்போது பத்திரிகையை விடுத்து ஃபேஸ்புக் மற்றும் ஏனைய சமூக வலைத்தளங்களிலும் தகவல்களை வாசித்து உடனுக்குடன் அறிந்துகொள்ளக் கூடிய வசதி காணப்படுகின்றது.

பாடல்களை எழுதும் போது பாடலா சிரியர்கள் கவனிக்க வேண்டிய முக்கிய மான விடயங்கள் என்ன?

பாடல்களை எழுதுவதில் மிக முக்கிய பங்கு வகிப்பது ஓசை நயம், சந்தம், படிமம் ஆகியனவாகும். கற்பனைக் குதிரையில் அமர்ந்து பயணம் செய்கின்ற செயலை ஒத்ததே பாடல் எழுதும் கலையாகும். பாடல்களின் அருமையையும் பெருமையையும் அறிய வேண்டுமெனில் பழங்காலப் பாடல்களையும் தற்காலத் தின் ஒரு சில பாடல்களையும் உதார ணங்களாகக் கொள்ளலாம். பல பொழுது களில் பாடல் வரிகளைவிட இசை முதலிடம் பெறுவதால் பாடல் வெற்றி பெறும் சூழ்நிலையும் உருவாகின்றமை கண்கூடு.

உங்களது மெல்லிசைத் தூறல்கள் என்ற நூலில் உள்ள பாடல்கள் குறித்தும் கூறுங்கள்?

மெல்லிசைத் தூறல்கள் என்ற எனது நூலில் 36 பாடல்கள் உள்ளடங்கியுள்ளன. வாழ்வின் எல்லா நிலைகளிலும் இருந்து இப்பாடல்கள் உருவாக்கப்பட்டுள்ளன.

இன்பங்கள் பொங்கும் இரு பெரு நாளிலே என்ற எனது பாடல் பிரபல இசை அமைப்பாளரும் பாடகருமான திரு. டோனி ஹஸன் அவர்களினால் இசையமைத்துப் பாடப்பட்டு ஒரு ஹஜ் பெருநாள் தினத்தில் நேத்ரா அலை வரிசையில் ஒலி, ஒளிபரப்புச் செய்யப்பட்டுள்ளது. அதேபோல பிரபல பாடகர் கலைக்கமல் அவர்களினால் இசையமைத்துப் பாடப்பட்ட மக்காவில் பிறந்த மாணிக்கமே என்ற எனது பாடல் மண் வாசனையில் மகரந்தப் பூக்கள் என்ற பெயரில் வெளிவந்த இறுவட்டிலும் சேர்கக்கப்பட்டுள்ளது. இந்த இறுவட்டு வெளியீட்டு நிகழ்வின் போது பாடகர் கலைக்கமல் அவர்கள் விருது வழங்கி என்னை கௌரவித்தார். மேலும் எனது நூல் வெளியீட்டின் போதும் இந்தப் பாடல் மேடையில் ஒலிபரப்பு செய்யப்பட்டதும் குறிப்பிடத்தக்கது.

நீங்கள் சிறுவர் இலக்கியத் துறைக்கும் காத்திரமான பங்களிப்பைச் செய்துள்ளீர் கள். அந்தவகையில் அண்மையில் வெளியிட்ட மான் குட்டி என்ற சிறுவர் பாடல் நூல் பற்றிக் குறிப்பிடுங்கள்?

இந்நூல் தேசிய நூலக ஆவண வாக்கல் சபையின் அனுசரணையில் வெளியிடப்பட்டது. இதில் 13 சிறுவர் பாடல்கள் காணப்படுகின்றன. பாலர் வகுப்பு மாணவர்களின் சிந்தனைக்கு விருந்தான பாடல்களும் கண்ணுக்கு விருந்தான சித்திரங்களும் இதில் உள்ளடக்கம் பெற்றுள்ளன. இந்நூலுக்கான அணிந்துரையை பேராசிரியர் செ. யோகராசா அவர்கள் வழங்கி இருக்கிறார். சிறுவர் இலக்கியப் படைப்பில் இது எனது ஆறாவது நூல் என்பது குறிப்பிடத்தக்கது.