தேயிலை தேசத்து சாமான்யனுடன்…

நம் பாரம்பரிய இலக்கியங்கள், பண்பாடுகள், கலாசாரங்கள் இவற்றையெல்லாம் சிதைவின்றி  நம் எதிர்காலத் தலைமுறையினருக்குக் கொண்டு சேர்ப்பதற்கான வழிமுறைகள் எவை?

இது  மின்னணு யுகம். இலக்கியங்களை முடிந்தளவு மின்னிதழ்களில் பதியலாம். என்றாலும் பழைய ஓலைச்சுவடிகளை இன்றும் ஆய்வாளர்கள் வாசிப்பதைப்போல தேடல் மிகுந்த எதிர்கால சந்ததியினர் தேடி வாசிப்பார்கள். ஆனால் கலாச்சாரமும் ,பண்பாடும்  மாற்றமடைவதை முற்றாக தடுக்க முடியாது, என்றாலும் நம் பாரம்பரிய விழாக்கள், திருமண வைபவங்கள்,ஏன் மரணச்சடங்குககளில் கூட பாரம்பரியத்தையும்,கலாச்சாரத்தையும் கட்டாயமாக கடைபிடித்தால் எதிர்கால சந்ததியினரும் அதை ஓரளவுக்காவது பின்பற்றுவார்கள்.

வாழ்க்கையில் பல கரடுமுரடான பாதைகளில் பயணப்பட்டு வந்தவர் நீங்கள். உங்களது இன்றைய உயர்விற்கான காரணகர்த்தா யார்?

நான் தமிழில் நான்காம் வகுப்பும்,சிங்கள மொழியில்  ஏழாம் வகுப்பும் கற்றவன்.என் இலக்கியப்பயணத்திற்கு காரணம் வாசிப்பு பழக்கமே! இலக்கியத்துறையில் நான் வளர காரணமானவர்கள், பிரபல பல்துறை கலைஞர் கலைக்கமல்,மஹ்தூம் ஜமால்தீன் ஐயா,திரு மாணா மக்கீன் ஐயா,திருமதி லீலா இராமையா அம்மையார், திரு தமிழ் நெஞ்சம் அமின் ஐயா ஆகியோர் என் நன்றிக்குரியவர்கள்.

தற்கால எழுத்தாளர்களில் பெரும்பான்மையானவர்கள் எழுத்துச் சுதந்திரம் எனும் பேரில் கண்டதையும் எழுதுகிறார்களே! ஒரு எழுத்தாளனின் எழுத்துச் சுதந்திரம் என்பது  எந்தவகையில் பேணப்பட வேண்டும்?

அதுதானே எழுத்துச்சுதந்திரம்? எழுதும் எல்லாமே காலத்தை வென்று வாழாது.எல்லா காலங்களிலும் இத்தகு இலக்கியங்கள் வந்துகொண்டுதான் இருக்கின்றன,காலம் நல்லதை வைத்துக்கொண்டு அல்லாததை ‘குப்பை’க் கூடையில் போட்டுவிடும்.

அதனால் கவலை வேண்டாமே!

உங்கள் எதிர்காலத் திட்டங்கள், வெளியீடு காணவிருக்கும் நூல்கள் பற்றி என்ன சொல்ல விரும்புகிறீர்கள்?

பெரிய திட்டங்கள் எதுவுமில்லை.இறைவன் வழி நடத்துவான் என்ற நம்பிக்கையில் பயணிக்கும் நான், அடுத்து ஆறாவது நூலாக “ஒரு பிடி கொழுந்து”என்ற கவிதைத் தொகுப்பை வெளியிட முயன்று வருகின்றேன்.

கடைசியாக, நமது தமிழ்நெஞ்சம் இதழைப் பற்றிய உங்கள் கருத்து?

மின்னிதழாக மின்னும் ‘தமிழ்நெஞ்சம்’  மாத இதழ் அச்சிலும் வருகின்றது.

உலகம் முழுதுமுள்ள தமிழ் நெஞ்சங்களைக் கவர்ந்து வெற்றிநடை போடும் ‘தமிழ் நெஞ்சம்’ எப்போதும் புதியவர்களை  வாழ்த்தி வரவேற்கத் தயங்குவதில்லை. ஆசிரியர் தமிழ் நெஞ்சம் ஐயா பிரான்சிலிருந்தாலும் தமிழை வளர்ப்பதில் ஒரு சாதனையாளரே! சாமானியனான என் ‘கொழுந்தம்மா’ நூலை சென்னையில் வெளியிட்டு என்னை இந்திய வாசகர்களுக்கு அறிமுகப்படுத்தியதை மறக்கவே முடியாது.

இறுதியாக தமிழ்நெஞ்சம் ஆசிரியர் தமிழ் நெஞ்சம் அமின் ஐயா, வாசகர்கள், மேலும் இந்த நேர்காணலை நடத்திய சகோதரி வஃபீரா ஆகியோருக்கு நெஞ்சார்ந்த நன்றிகள்!

எழுத்தாளரும் கவிஞருமான கோவுஸ்ஸ ராம்ஜி வெற்றிப்பாதையில் பயணித்து இலக்குகளை எய்த தமிழ்நெஞ்சம் சார்பாக நாமும் வாழ்த்துகிறோம்.