பத்து கேள்விகள். மூவரின் முத்தான பதில்கள்

யார் நீங்கள்?

இந்த உடலுக்கு வைக்கப்பட்ட பெயர் தேவி… இந்தப் பிறவியில் இந்த உடல் ஏற்ற ஆத்மா மருத்துவராக, பெருமாள் பக்தையாக, தமிழ் மொழிக்குத் தொண்டாற்றும் சேவகியாக, கவிஞராக, எழுத்தாளராக பேச்சாளராக, இன்னும் சமூக நலன் விரும்பியாக , குடும்பத் தலைவியாக தன்னால் இயன்றதை செய்கிறது. ஆனால் உண்மையில் நான் எனும் ஆத்மாவிற்கு உருவமில்லை.. அது ஏற்ற கூட்டைப் பிரிந்தப்பின் வேறு கூட்டை அடைந்து வேறு பெயர் சூட்டப்படும்.

இன்றைய அவசர உலகில் குடும்பங்கள் அன்பை பேணுகிறதா?

அன்பென்ற ஒன்று இருப்பதால்  தான் குடும்பம் என்ற கட்டமைப்பு இயங்கிறது.  ஆயினும் என்ன, பெரிய கூட்டுக்குடும்பம் என்ற நிலை மாறி , தனிக்குடும்பமாக இயங்குகிறது. வேலை பளு காரணமாக நிறைய நேரங்கள் குடும்பத்திற்கு செலவிட இயலவில்லையே தவிர அன்பை பேணுவதில் என்றும் மனிதர்கள் மனிதர்களாகவே இருக்கின்றனர்.

எல்லாமே தேய்ப்பு அட்டையாக மாறிவிட்ட இன்றைய நிலையில் மனிதர்கள் செலவை சிக்கனமாக செய்கிறார்களா? ஆம் எனில் எப்படி இல்லை எனில் எப்படி யான மாற்றம் நன்மை தரும்?

இல்லை. தேய்ப்பு அட்டை வந்தது நமது நேரம் வீணாவதைத் தடுக்கத்தான். ஆனால், மாதம் ஒன்றாம் தேதி வருமானத்தை வாங்கி அதில் மாத கட்டாயச் செலவுகளுக்கு எடுத்து வைத்து சேமிப்பிற்கு எடுத்து வைத்து மீதியிருக்கும் தொகையில் கணக்குப் போட்டு எண்ணி செலவு செய்து வந்தோமே… அது, எல்லைக்கு மீறிய செலவுகளை செய்யாது காத்தது.

இன்றைய, இந்த தேய்ப்பு அட்டை முறை பல நேரங்களில் கணக்கில் பணம் தீர்ந்தப்பின் தான்  நமக்கே தெரியும் அப்புறம் என்ன கடன் அட்டையை பயன்படுத்தி முன் கூட்டி கடனாக பொருட்கள் வாங்கி அந்த கடனை அடைக்க படும்பாடு… பெரும்பாடு ஆகும்.

ஆகையால்,

1) வரவையும் செலவையும் கணக்கில் கொண்டு எழுதி வைத்துச் செலவு செய்தால் இந்த தடுமாற்றத்தைத் தவிர்க்கலாம் கடனின்றி வாழலாம்.

2) தனியாக ஒரு கணக்கில் இவ்வளவு தான் வீட்டு செலவிற்கு  போட்டு வைத்துக் கொள்ள வேண்டும்

3) கடன் தேய்ப்பு அட்டையில் வாங்கும் பொருட்களுக்கான தொகையை சம்பளம் வந்ததும் முதலில் செலுத்திவிட்டு மீதமுள்ளத் தொகைக்குள் செலவு செய்ய வேண்டும்.

இதைத்தான் நான் செய்கிறேன்.

இன்றைய கல்வி முறை உங்களுக்கு திருப்தியை தருகிறதா? ஆம் எனில் எப்படி இல்லை எனில் ஏன்?

இன்றைய கல்வி முறை திருப்தியைத் தரவில்லை. பெற்றோருக்கும் குழந்தைகளுக்கும் மன அழுத்தம் மிகுந்ததாக உள்ளது

ஆற்றங்கரையில் துவங்கிய நாகரீகம் இன்று சிதைவுற்றுள்ளதா அல்லது கால மாற்றத்தில் சரியான பாதையில் பயணிக்கிறதா?

கால மாற்றத்தில் பயணிக்கிறது.  இது, சரியான பாதையா என்றால், சில இப்படியும் , சில அப்படியுமாகவே இருக்கிறது. ஆயினும் மாற்றங்கள் பல நன்மைத் தருவன தான். எனவே, மாறாத மாறமும் மாறும் வரவேற்போம். 

பெண்களின் முன்னேற்றத்தில் தமிழ் மொழி பங்காற்றுகிறதா?

பொதுவாக பெண்களின் முன்னேற்றம் என்பது மொழி, மதம், நாடு.. என்பதை யெல்லாம் கடந்து அவர்களின் தனித்தன்மையாலும் திறமையாலும் அறிவாற்றலும் தான் இருக்கும்.  இதில், வேண்டுமானால் தன் கணவரோ , உடன் பிறந்தவரோ , நட்பில் உள்ளோரோ  உற்சாகமூட்டி பக்க பலமாக இருக்கலாமே அன்றி மொழி அவ்வாறு பங்காற்ற இயலாது. எனவே, மொழியை நாம் நமது சிந்தனைகளை அறிவார்ந்த விடயங்களை வெளிப்படுத்தப் பயன்படுத்திக் கொள்ள மட்டுமே முடியும்.

தாய் மொழியில் பெருவாரியான மாணவர்கள் மதிப்பெண் குறைத்துப் பெறுவதை உணர்கிறீர்களா…பெற்றோரில் பலர் அதை ஒரு பொருட்டாக கருதுவதில்லையே ஏன்?

ஆம், தாய்மொழியில் பெருவாரியான மாணவர்கள் குறைவான மதிப்பெண்களே பெறுகிறார்கள். உணர்கிறோம்.   காரணம் எந்த துறை சார்ந்த மேல் படிப்பிற்கும் தமிழ் மதிப்பெண்ணை கணக்கில் எடுத்துக் கொள்வதில்லையே. கணிதம் வேதியியல் உயிரியல் இயற்பியல் என இவைதானே தேவைப்படுகிறது.

உடல் திறன் விளையாட்டுகளில் இளம்பிள்ளைகள் ஆர்வம் கூட என்ன செய்ய வேண்டும்?

உடல் திறன் விளையாட்டுப் பற்றிய புரிதலையும் நன்மைகளையும் எடுத்துச் சொல்லி… உடல் பலமாக இருந்தால் தான் மனமும் பலமாக இருக்கும் என்பதையும் போட்டியான இந்த உலகில்  அறிவை மட்டும் வைத்துக் கொண்டிருந்தால் போதாது அதை செயல்படுத்த நோய் எதிர்ப்புச் சக்தியை கூட்ட உடலை ஆரோக்கியமாக வைத்துக் கொள்ள வேண்டும் அதற்கும் மேல் மனநிலைக்கு தக்க மாற்றம் தந்து மன அழுத்தத்தைப் போக்கவும் விளையாட்டு தேவைப்படுகிறது என்பதை அறிவுறுத்த வேண்டும்.

இயல்பாக பெருவாரியான பிள்ளைகளுக்கு தெரிந்த நீச்சல் இன்று இளைஞர்களுக்கு கூட தெரிவதில்லையே ஏன்? இதை மாற்ற ஏதும் வழியுண்டா?

இன்றைய கால கட்டத்தில் பந்தயக் குதிரைகளாக ஓடும் குழந்தைகளுக்கு கழுதையைக் காட்டிலும் அதிகம் பொதி சுமக்கத் தேவையாகிறது. அது மட்டுமல்லாமல்  இன்றைக்கு குழந்தைகளுக்கு நீச்சல் கற்றுக்கொடுக்க நேரம் குழந்தைகளின் பெற்றோருக்கு இருப்பதில்லை. இதற்கான வகுப்புகளுக்கும் தொகை அதிகம் கட்ட வேண்டியுள்ளது. இருந்தும் சில இடங்களில் பாதுகாப்பற்றத் தன்மை நிலவுகிறது. ஆகையால் தான் அதிகம் நீச்சல் கற்றுக்கொடுப்பதில்லை. மீண்டும் பழைய காலம் திரும்பினால் மாற்றத்திற்கு வழியுண்டு.

புதிதாக தமிழில் ஐந்து கலைச்சொல் கூறுங்களேன்

முகக்கவசம்

மகிழுந்து

புலனம்

பற்றியம்

மின்தூக்கி