தூக்கத்தில் வருவதல்ல கனவு – உன்னைத்
தூங்காமல் செய்வதுதான் கனவாம் – என்றே
ஊக்கத்தை நமக்கெல்லாம் தந்தவர் – இந்த
உலகறியத் தலைமகனாய் வந்தவர்!
இளைஞர்க ளின்எழுச்சி நாயகர் – அவர்
இணையில்லாக் குணம்படைத்தத் தாயவர் – நாட்டின்
நிலையறிந்து முன்னேறச் செய்தவர் – மக்கள் நெஞ்சத்தில்
நீங்காமல் நிற்பவர்!
கொள்கையிலே குன்றாக நின்றவர் – செயற்கைக்
கோள்விட்டுச் சிகரத்தை வென்றவர் – நாட்டை
வல்லரசாய் ஆக்கிடவே விளைந்தவர் – திரு
வள்ளுவரின் குறள்கற்றுத் தெளிந்தவர்!
மதங்கடந்து மனிதனாக வாழ்ந்தவர் – இளம்
மாணவர்க்கு வழிகாட்டி ஆனவர்! – நல்
உதவுகின்ற உள்ளத்தைப் பெற்றவர் – என்றும்
உயர்வான எண்ணத்தை விதைத்தவர்!
அணுகுண்டைப் பொக்ரானில் வெடித்தவர் – இந்த
அகிலத்தை வியக்கத்தான் வைத்தவர் – மனத்தில்
கனவுதனைக் காணத்தான் செய்தவர் – அந்த
கனவுதனை நனவாக்கச் சொன்னவர்!
விண்தன்னில் ஏவுகணை விட்டவர் – அவர்
வெற்றிமிகுச் சாதனைகள் புரிந்தவர் – கடமைக்
கண்ணியம்கட் டுப்பாடும் கொண்டவர் – அவர்
காலமெல்லாம் துணையின்றி வாழ்ந்தவர்!
எளிமையாக எப்போதும் இருந்தவர் – அவர்
ஏற்றமிகுக் கவிதைகளைத் தந்தவர் – பெரும்
வலிமையான உள்ளத்தைப் பெற்றவர் – நாட்டை
வளமையாக ஆக்கிடவே முயன்றவர்!
நதிகளையும் ஒன்றிணைக்கச் சொன்னவர் – மரம்
நடுவதற்குப் முனைப்பாக இருந்தவர் – தன்
மதியாலே ஊனமுற்றோர் நடந்திடச் – செயற்கை
மாற்றுமுறை கால்தன்னைத் தந்தவர்!
அவர்வழியைப் பின்பற்றிச் செல்லுவோம் – நல்ல
ஆக்கத்தை எந்நாளும் செய்யுவோம் – நான்குச்
சுவருக்குள் முடங்கியேக் கிடக்காமல் – சுற்றுச்
சூழலையும் இன்றேநாம் காப்போம்!
