புரட்சி வெடிக்கட்டும்!

புரட்சி எங்கும் வெடிக்கட்டும் – தமிழ்
புலிகள் கூட்டம் கிளம்பட்டும்!
புரட்டுப் பேசும் கூட்டத்தை – அது
புரட்டிப் போட்டே வீழ்த்தட்டும்!

மாற்றம் மண்ணில் மலரட்டும் – நம்
மடமைத் தனங்கள் விலகட்டும்!
ஏற்றம் காண எங்கெங்கும் – புது
எழுச்சிப் பண்கள் ஒலிக்கட்டும்!

உழவுத் தொழிலும் செழிக்கட்டும் – நம்
உள்ளம் மகிழ்ச்சி கொள்ளட்டும்!
வளமாய் நாட்டை மாற்றிடவே – ஒரு
வண்ணத் தமிழன் ஆளட்டும்!

விடையும் காண விரையட்டும் – நல்
வெற்றிக் கனியைப் பறிக்கட்டும்!
குடியால் வீழ்ந்து கிடப்போரும் – தமிழ்க்
குடியைக் காக்க விழிக்கட்டும்!

அடிமை வாழ்வு ஒழியட்டும் – தமிழன்
ஆட்சி பீடம் ஏறட்டும்!
விடியல் கண்ணில் தோன்றிடவே – தமிழ்
வீரம் மண்ணில் விளையட்டும்!

தெளிவும் மனத்தில் தோன்றட்டும் – தமிழ்
தென்றல் காற்றாய் வீசட்டும் !
இழி(ளி)வைத் தடுக்க எழுந்தேவா – மன
இருளும் மறையக் காணட்டும்!