யாருக்கும் வாய்ப்பதில்லை !

காரிருக்கு வீடிருக்கு கையினிலும் பணமிருக்கு
பலபேரின் நட்பிருக்கு பரிசுகளும் குவிந்திருக்கு
என்றாலும், மனத்தளவில் என்னவோ குறையிருக்கு
எதுவென்று தெரியாமல் ஏக்கமே நிறைந்திருக்கு!

முதுமைவரும் காரணமா முறுவல்வர மறுப்பதுவா
தனிமைவரும் எனும்நினைப்பு தலைதூக்கி வருவதுவா
ஓடியோடி உழைத்துவாங்கி உள்வீட்டில் சேர்த்ததெலாம்
யாரினிமேல் பார்த்திடுவார் எனுமெண்ணம் எழுவதுவா!

பிறந்தநாள் வருவதனை பெரும்பாலும் விரும்பவில்லை
குறைந்தநாள் ஆகிடுமோ எனுமேக்கம் வந்துநிற்கும்
பட்சணங்கள் செய்தாலும் பசிகூட வருவதில்லை 
விருப்பமுடன் அதைச்சுவைக்க இனிப்புநோய் விடுவதில்லை!

பிள்ளைகளோ அவர்பாட்டில் பேரர்களோ விளையாட்டில்
மருமக்கள் எமைக்கண்டால் மெளனமாய் சிரித்திடுவார்
எமையொத்த வயதுடையார் இயலாமை காரணத்தால்
ஏங்கித் தவிப்பதனை வலைதளத்தில் பார்த்துநிற்போம்!

காலையில் எழுவதற்குக் காரணமும் தெரிவதில்லை
மாலைவந்து விட்டதென மணிக்கூடு காட்டிநிற்கும் 
பாயிலே எமக்குமுன்னே நோய்வந்து படுத்துவிடும்
பதறிநாம் துடித்தாலும் பார்த்தபடி சிரித்துநிற்கும்!

கலைநிகழ்ச்சி கல்யாணம் காண்பதற்குச் சென்றாலும்
பலபேரும் எம்பக்கம் பார்த்திடவே மாட்டார்கள் 
சிலவேளை பார்த்தாலும் திரும்பாமல் சென்றிடுவார் 
அதுவே எம்மனநிலையை அடியோடு மாற்றிவிடும்!

முதுமைபற்றி நினைத்துவிட்டால் முகங்கூட மாறிவிடும்
எதுவுமே எங்களுக்கு எதிரியாய்தான் தெரியும் 
உடல்தளர்ந்து போனாலும் உளம்தளர்ந்து போகாமல் 
உளம்நிறைய மகிழ்ச்சிதனை ஊற்றெடுக்கச் செய்திடுவோம்!

எமையொதுக்கி நிற்பவரும் இந்நிலைக்கு வந்திடுவார்
இலையுதிர்வு நிலையதனை இயற்கையே கொடுத்திருக்கு 
தலைநரைக்கும் பல்லுவிழும் தளர்வுவந்து தாக்கிவிடும் 
அதைத்தவிர்த்து வாழ்ந்துவிடல் யாருக்கும் வாய்ப்பதில்லை!