வங்கியிலிருந்து வந்ததொரு கவிதைப்புயல்

மரபுக்கவிதையின் மீது ஏன் திடீரெனக் காதல் வந்தது?

எண்பதுகளில் திராவிடர் கழக மேடைகளில் புரட்சிக் கவிஞர் பாடல்களை சேலம் அருள்மொழி அவர்கள் சிறுமியாக உணர்ச்சி பொங்கப் பாடக் கேட்டது முதல் பாதிப்பு. பின்னர் மதுரை புரட்சிக் கவிஞர் வாசகர் வட்டம், மதுரை புரட்சிக் கவிஞர் பேரவை போன்ற அமைப்புகளில் இணைந்து ஒரு பொறுப்பாளனாகப் பணியாற்றக் கிடைத்த வாய்ப்பு.

மொத்தத்தில் மரபுக் கவிதைகளின்பால் என்னை ஈர்த்தது புரட்சிக் கவிஞரின் பாடல்களே!

தொண்டு செய்து பழுத்த பழம்
தூயதாடி மார்பில் விழும்
மண்டைச் சுரப்பை உலகு தொழும்
மனக்குகையில் சிறுத்தை எழும்!

பெரியாரை ஓவியமாய் வரைந்த புரட்சிக் கவிஞரின் மறக்கவொண்ணாப் பாடல்.

அடுத்து அன்புச் சகோதரர் சுப.முருகானந்தம் அவர்களின் வாழ்வியல் குறள் வெண்பா.

ஏன் புதுக்கவிதை ஹைக்கூ போன்றவற்றை முயற்சிக்கவில்லை?
.
வெறுப்பு ஏதுமில்லை. புதுக்கவிதை ஹைக்கூ கவிதைகளின் பொருண்மையும் நுட்பமும் இன்னும் கற்றேனில்லை.
கருத்தினைச் சொல்லும் ஊடகமாகத் தான் கவிதையைப் பார்க்கின்றேன். அது எந்த வடிவமாக இருந்தால் என்ன?
முதலில் மரபு வகைகளைப் பழுதறக் கற்பதே எனது எண்ணம். இன்னும் மரபைக் கற்றுக்கொள்ளும் மாணவனாகத்தான் உள்ளேன். தேர்ந்த மரபுக் கவிஞனே புதுக் கவிதையிலும் வெற்றிபெற்றுள்ளார்கள் என்பது மறுக்கவியலாத உண்மை. நானும் எழுதுவேன் வரும் நாட்களில்.

விருத்தங்கள் எழுதுவதில் வல்லவராகத் தங்களை உருவாக்கிக் கொண்டது எவ்வாறு?

01.பாட்டரசர் கி.பாரதிதாசன் அவர்களின் வழிகாட்டுதலோடு பாவலர் பயிலரங்கத்தில் பெற்ற எழுத்துப் பயிற்சி. அதைத் தாண்டி பல நாட்கள் அவருடன் மணிக்கணக்கில் இலக்கியம் இலக்கணம் பற்றி அவருடன் பேசியினூடாய்ப் பேசிப் பெற்ற தெளிவு. சென்ற வாரம் கூட என்னை அழைத்து நான் எதுகையைக் கையாள்வதில் செய்யும் ஒரு பிழையைச் சுட்டினார். நான் செய்தது தவறில்லை என்றாலும் புலமை குன்றிய செயல் என்று சுட்டினார். பாட்டரசர் சொல்வதுபோல் மரபுக் கவிதையை ஆசான் ஒருவரிடம் நேரடியாகக் கற்றால் புலமை மேம்படும். இன்றும் தொடர்ந்து வழிநடத்தும் பேராசானாய் பாட்டரசரைப் பெற்றதென் பேறு.

02.தொடர்ந்து எழுதுவது. மற்றவர்களின் கவிதைகளைப் படிப்பது. பாவலர் பயிலரங்கத்தில் எனது முன்னோடிகளான திரு.இராம வேல்முருகன், திரு.சிவப்பிரகாசம் திரு.சுப முருகானந்தம் ஆகியோரின் பாடல்களை பயிலரங்கத்தில் படித்துச் சுவைத்தது.

03. கவிக்கோ துரைவசந்தராசனின் பாடல்களைப் படித்துச் சுவைத்து அதன் நுட்பங்களைக் கண்டு வியந்தது. பின்னர் அவருடன் நட்பு கொண்டு பழகும் வாய்ப்பில் இன்னும் பல நுட்பங்களை அறியத் தந்தார். முதலில் சீர்களை அடர்த்தியாக எப்படிப் படைக்க வேண்டும் என்பது பற்றி விளக்கம் தந்தார். சமகாலச் சொல்லாடல்களை அறிவியல் சொற்களைப் பாடலில் பயன்படுத்தும் நுட்பம் அறிந்தவர் கவிக்கோ. புதுக்கவிதையை மரபு வடிவத்தில் எழுதும் திறன் வாய்த்தவர் அய்யா கவிக்கோ அவர்கள்.

இவர்கள் அனைவரின் கலவைக் கொடையே இன்றைய நான். விருத்தம் இயற்றுவதில் வல்லவன் நான் என்பதை ஏற்றேனில்லை.

பெரியார் மீது அளவற்ற பற்று வரக் காரணம் என்ன?

இன்று நான் மானமுள்ள மனிதனாக வாழும் வாய்ப்பைத் தர வாழ்நாள் முழுவதும் போராடியவர் என்பதால். ஆணாக இருந்து பெண்ணுக்கும் உயர்ந்த இடைநிலைச் சாதியில் பிறந்தும் தாழ்த்தப்பட்டவர்களுக்கும் செல்வந்தராய்ப் பிறந்தும் ஏழைக்கும் வக்காலத்து வாங்கிய கட்டணம் வேண்டா வழக்கறிஞர்! தான் எதுவாக இல்லையோ அந்த எதிர்நிலையை ஆதரிப்பது அரிய குணம். அவர்தான் பெரியார்.

கடவுள் மறுப்பாளர்கள் ஆன்மிகவாதிகளுடன் அதிகம் நட்பு பாராட்டுவதில்லை என்பது உண்மையா?

தங்களின் இந்தக் கருத்து உண்மையானால் என்னால் குடும்பம் நடத்த இயலாது. எனது இணையர் கடவுள் நம்பிக்கை கொண்டவராக திருமணக் காலகட்டத்தில் மாறிவிட்டார். பலமுறை அவருக்குத் துணையாகக் கோயிலுக்கும் சென்றுள்ளேன். இன்றும் என்னை சூடம் ஊதுபத்தி பூ வாங்கி வரச் சொல்வார். எங்கள் மகனும் பகுத்தறிவாளர்கள் இறை நம்பிக்கை அற்றவர்கள். இறை நம்பிக்கை தனியரின் விருப்பம் எனும் புரிதல் கொண்டவன் நான்.

இன்றும் அனைத்துச் சாதியினரும் அர்ச்சகராக வேண்டிப் போராடுபவர்கள் நாங்கள். கடவுள் எங்கள் எதிரி அல்ல. ஏற்றத்தாழ்வுகளைப் போற்றும் சாதிமுறையே எங்கள் எதிரி.
சாதியத்தைத் தூக்கிப் பிடிக்கும் மதக்கோட்பாடுகள் எங்கள் எதிரி. இந்த மதங்களின் அடிக்கட்டுமானமாக ஆணிவேராக கடவுள் என்னும் கருத்தை இந்த மதவாதிகள் முன்நிறுத்துகிறார்கள். எனவே நாங்கள் கடவுள் என்னும் கருத்தியலை எதிர்க்கிறோம். இறைநம்பிக்கை கொண்டவர்களை அல்ல.

நான் நாமக்கல் கிளையில் வங்கியில் மேலாளராகபணியாற்றிக் கொண்டிருந்த வேளை (2009) பெங்களூரில் இருந்து ஆஞ்சநேயரை வழிபட வந்த பக்தர் ஒருவர் எனது அறைக்குள் நுழைந்தார். கோயில் கூட்டத்தில் அவருடைய பணப்பை திருடப்பட்டு விட்டது. கையில் பணமும் இல்லை வங்கி அட்டையும் இல்லை. ஆனால் அவருக்கு பெங்களூரில் உள்ள எங்கள் வங்கியின் கிளையில் வைப்புத் தொகையும் கணக்கில் பணமும் இருந்தது. என்னிடம் வந்து உதவி கேட்டார் ஊருக்கு செல்வதற்கு பணமே இல்லை என்று. தேவையான அடிப்படை பாதுகாப்பு ஏற்பாடுகளைச் செய்துகொண்டு பெங்களூர் கிளையைத் தொடர்பு கொண்டு அவருடைய கணக்கிலிருந்து ரூபாய் ஐயாயிரம் எனது கணக்கிற்கு மாற்றச் சொல்லி வாங்கி பின்னர் அவருக்கு ஊருக்கு திரும்பிச் செல்ல பணத்தைக் கொடுத்து அனுப்பினேன். இந்த நடவடிக்கைக்கு முழுப் பொறுப்பையும் நான் ஏற்றுக் கொள்வதாக எழுதிக் கொடுத்த பின்னரே பணம் எனது கணக்கிற்கு மாற்றப்பட்டது. அப்போது அவரின் துயர மனநிலையைக் கண்டு இரங்கித்தான் இந்த உதவியைச் செய்தேனே தவிர அவர் பெங்களூரில் இருந்து நாமக்கல்லுக்கு ஆஞ்சநேயரைக் கும்பிட வந்த ஒரு பக்தர் என்ற வெறுப்பு என் மனத்தில் துளியும் இருந்ததில்லை என்பதே உண்மை.

தந்தை பெரியார் எங்களுக்கு சொல்லிக் கொடுத்த அடிப்படைப் பாடமே மனிதநேயம். அதை எப்படி மறப்பது? பெரியாரியவாதிகள் மனிதனை மனிதனாக மட்டுமே பார்க்கக் கற்றவர்கள்.