தாய்நாட்டை பிரிந்த
அகதிபோல் ஆனேன்
உன்னைப் பிரிந்து
வாடும் நான்

– தட்சணா மூர்த்தி

கொடுத்துச் சிவந்த
கரங்களைக் காண்கிறேன்!
குங்கும வியாபாரி
என்றால் அப்படித்தான்!

– க.பன்னீர் செல்வம்

ஆயிரக் கணக்கானோரை
எழுப்ப வேண்டும்
மரணத்திற்கெதிரான மருந்து
யார் கையில் இருக்கும்?

– முனைவர் ம.ரமேஷ்

தொடரி கிளம்பி நேரமாயிற்று.
சன்னலில் எட்டிப் பார்க்கிறேன்.
இன்னும் துரத்தியவாறே…
உன் நினைவுகள்.

– புகழேந்தி

எனக்குள்
நீ.
ஒளிந்து விளையாடமுடியாமல்
நான்.

– காவனூர். சீனிவாசன்.

மரம் குறித்து
கவிதை ஒன்று
எழுதுகிறேன் குறிப்பேட்டில்
படபடக்கிறது தாள்.

– சக்திஅருளானந்தம்

நமக்குத் தெரியவில்லை
அதற்குத் தெரிந்திருக்கிறது
எங்கோ துளிர்விடுகிறது
பச்சை மூங்கில்.

– வெற்றிப்பேரொளி

காயங்களும் கண்ணீரும்
சொந்தமாகிப் போன வாழ்வில்
விரக்தியிடமிருந்து
விலகித்தான் நிற்கிறேன்…

– ஆத்தூர் சாகுல்

பேருந்துப் பயணத்தில்
ஊசி விற்ற சிறுவன்
தைத்துக்கொண்டே வருகின்றான்
என் பயணம் முழுதும்.

– ஆ.நடராஜன்

வயலை உழுகின்ற உழவன்
அரை நிர்வாணமாய்
வரப்பில் நின்ற பொம்மை
அழகான ஆடையுடன்..!

– அனுராஜ்

வாசனை இல்லா
வண்ண வண்ணப் பூக்கள்
பறிக்க முடியாதபடி
அவள் சேலையெங்கும்.

– தமிழ்.

நடந்த தூரத்தை
அளவிட முடியவில்லை
சுற்றும் பூமியை
நிறுத்திட இயலாது.

– வா.சண்முகம்

உலக நாடுகளைச்
சுற்றிப் பார்க்கும் சிறுவர்கள்.
கீழே விழுந்து உடைகிறது
பொம்மை விமானம் .

-ஆ.நடராஜன்

நிமிர முடியாதவனுக்குத்
தாள்களே தலைகள் !
நிமிர்ந்தே நடப்பவனுக்குத்
தலைகளே தாள்கள் !

– கவிக்கோ துரைவசந்தராசன்

உயிர் இல்லையென்றாலும்
உயிர்பயம் காட்டுகிறது
அத்துமீறும் பறவைகளுக்கு
சோளக்காட்டு பொம்மை..

– தென்பரை இராக பாஸ்கர்

வண்ணங்களில் சிறந்தது
கறுப்புதான் என்கிறேன்…
காரணம் கேட்கிறீர்கள்
கண் இல்லை எனக்கு.

– செல்வா ஆறுமுகம்

நீ எப்பாத்திரத்தில்
ஊற்றுகிறாயோ..
அப்பாத்திரத்தில்
நிறையும் நீராவேன்..

– சாரதா க. சந்தோஷ்

பாடு பொருள் என்னிடம்
ஏதும் இல்லையென
நினைத்துக் கொள்ளாதே …
உனது கொலுசொலிகள் உள்ளனவே !

– கா.ந.கல்யாணசுந்தரம்

உச்சாணிக்கொம்பில்
என்னை ஏற்றி விட்டு
உற்சாகத்தில் பலர்
தன்னந்தனிமையில் நான்..

– லஷ்மி கார்த்திகேயன்

ஒரு தெரு கூட
இத்தனை கிளர்ச்சி தருமா
எதிர்பார்க்கவில்லை
நீ வசிப்பதால்.

– பான்ஸ்லே

நீ ஓர் அலகு
நான் ஓர் அலகு
இருவரும் இணையின்
அதுவே பேரழகு !

– நளினி தேவி

வாழ்க்கையை ஒரு
கேள்விக்குறியோடுஅணுகுகிறேன்
அதுவும் கேள்விக்குறியோடு
என்னை தினம் பார்க்கிறது

– சரஸ்வதி ராசேந்திரன்

நிதர்சனம் இதுவென்ற
புரிதலின்
உணர்தலால்
இயல்பு வசப்படுகிறது!

– அன்புச்செல்வி சுப்புராஜு

பனிக்குடம் உடைந்து ஓடுகிறது
தடைகளை மீறி
அந்த ஆறடி பள்ளத்தை நோக்கி
மனித வாழ்க்கை.

– த.அதியமான்

உனக்குள் புதிதாக
வெட்கம் முளைத்து
துவங்கப் பட்டது
என்னை வீழ்த்தும் யுத்தமொன்று.

– தமிழ் அரசன்

எப்பொழுதும் மிஞ்சம்
வைக்கிறார் அப்பா
குழந்தைகள் உறங்கியதும்
பசியாறினாள் அம்மா.

– கேசவன் புருஷோத்தமன்

கையசைத்து அவள்
பேசத் தொடங்கினாள்
விழி அசைக்காமல்
சிலையாகி போனேன்

– ஷர்ஜிலா யாகூப்

காண்போரிடமெல்லாம்
கவனமாக கைகொடுக்கிறான்
அந்த ஒற்றைக்கல் மோதிரம்
காதலியின் அடையாளம்…

– ஐ.தர்மசிங்

தூக்கத்திற்கு நான்
பாய் விரிக்கிறேன்
ஏக்கம் எங்கிருந்தோ வந்து
சுருட்டிப் போடுகிறது

– கண்ணன் புலமி

எதையோ இழந்ததாக எண்ணி
வருந்திக் கொண்டிருந்தேன்.
இறுதியில்தான் தெரிந்தது நான்
இழந்தது என்னைத்தான் என்று.

– மா. ஷங்கர்

ரோஜாவை நினைப்பவர்கள்
முள்ளுக்கும் சேர்த்தே தான்
நீரிரைக்க வேண்டும் மனமே
மனித வாழ்வும் அப்படியே.

– ஜென்சி செல்வராஜ்

மறப்பதற்கு மனதை
திசை திருப்பிப் பார்க்கிறேன்
வார்த்தைகளின் வடிவமாக
அங்கும் வந்து வதைக்கிறாய்

– மருதா சமத்

ஒவ்வொரு சொல்லாக
உதிர்த்துக் கொண்டிருக்கிறாய்
நான் கவிதைகளாகக்
கோத்துக் கொண்டிருக்கிறேன்

– மதுரா

நாட்டின் குடிநீர் பஞ்சம்
அமைச்சரவையில் விவாதம்
அயல்நாட்டு பானங்களை
ருசித்தபடி…

– வெ. கலிவரதன்

ஆழ உழுது விதைத்தேன்
உன் நினைவு களை
மறுநாள்,,,,, நீ தான்
எங்கோ முளைத்து விட்டாயே

– பாவலர் வீரவாணன்

மிதிபட்ட புல் தலைநிமிர்கிறது
மீண்டும் வளர,
மனிதனுக்குப் பாடமிது-
கற்றுக்கொள்வானா…!

– செண்பக ஜெகதீசன்


மறுமொழி இடவும்

உங்கள் மின்னஞ்சல் வெளியிடப்பட மாட்டாது தேவையான புலங்கள் * குறிக்கப்பட்டன

Related Posts

எழுதக் கற்றுக்கொள்வோம்

ஹைக்கூ ஓர் அறிமுகம் – 29

தொடர்  29

இயற்கையின் ஒவ்வொரு நுட்பத்தில் இருந்தும் ஹைக்கூவை வடித்தெடுத்தார்கள் ஜப்பானிய கவிஞர்கள். இயற்கையை ஆராதிப்பதில் அவர்களுக்கு இணை அவர்களே. ஆகவே தான் ஹைக்கூ வாயிலாக இயற்கையையும்..இறைவனையும், ஒன்றாக கண்டார்கள்..

ஜென் என்பது மதமல்ல என ஏற்கனவே நாம் தெளிவுபடுத்தி விட்டோம்..ஆனால் ஆசான்களும்,

 » Read more about: ஹைக்கூ ஓர் அறிமுகம் – 29  »

எழுதக் கற்றுக்கொள்வோம்

ஹைக்கூ ஓர் அறிமுகம் – 28

தொடர் 28

ஹைக்கூவில் உத்திகள் என்பது ஹைக்கூவை வடிவமைக்க பயன்படுகிறது. பொதுவில் ஹைக்கூவில் ஈற்றடியை திருப்பம் வருமாறு அமைப்பதும், முரணாக அமைப்பதுமே உத்தி முறையாகும்.

எதுகையில் அமைப்பது மோனையில் அமைப்பது என அதுவும் உத்திமுறைகளாக சொல்லப் படுகிறது.

 » Read more about: ஹைக்கூ ஓர் அறிமுகம் – 28  »

எழுதக் கற்றுக்கொள்வோம்

ஹைக்கூ ஓர் அறிமுகம் – 27

தொடர் 27

ஹைக்கூ ஒரு அழகிய ஓவியம். அதை நீங்கள் ரசிக்கத் துவங்கும் போது பல பரிமாணங்களில் அது உங்களை பரவசப்படுத்தும்.

ஹைக்கூ கவிதைகளை நாம் கவியரங்குகளிலோ… வாசகர் இடத்திலோ வாசிக்கும் போது சில நடைமுறைகளை அவசியம் பின்பற்ற வேண்டும்.

 » Read more about: ஹைக்கூ ஓர் அறிமுகம் – 27  »